PORAC, Pampanga – Ang Environmental Clearance Certificate (ECC) na ibinigay sa Materials Recovery Facility (MRF) ng Primes Waste Solutions Pampanga, Inc. sa Barangay Planas, ang nagpapahintulot umano sa pagpasok ng hazardous waste kabilang ang pathological o infectious waste, sa nasabing lugar.

Sa pamamagitan ng ECC na inaprubahan ni DENR R3 Regional Director Martin Jose Despi para sa Prime Waste, ay pinahihintulutan ito na magpatakbo ng isang landfill cell para sa treated hazardous wastes tulad ng iba’t ibang mga basura (pathological o infectious waste) at stabilized na basura (solidified wastes, chemically fixed at polymerize wastes, at encapsulated wastes).

Kabilang sa nakahahawang mga basura ang medikal o klinikal na basura, mga materyales na maaaring magdulot ng mga nakakahawang sakit sa mga residente sa bayan ng Porac at mga kalapit na bayan tulad ng Floridablanca.

Kabilang sa mga nakahahawang dumi ay ang dugo at mga produkto ng dugo, mga ginamit na karayom, mga hiringgilya, scalpels, cultured at stock ng contagious agents; at mga dumi ng pathological tulad ng mga tissue at organ.

Ito ay mga basura na may potensyal na magdala ng mga pathogen at nagdudulot ng panganib ng impeksyon sa mga residente.

Nabatid na ang ECC na inilabas noong Agosto 2024, ay nagbigay-daan din sa Prime Waste na makapag-operate ng limang landfill cell na may kabuuang kapasidad na 450,000 tonelada. Ang bawat cell ay magkakaroon ng 15,000 metro kuwadrado na lugar.

Ang sertipiko na ibinigay kay Carla Angelica Peralta, director ng Prime Waste Solutions Pampanga, Inc. ay nakasaad na inaasahan nilang patuloy na ipatupad ang mga hakbang na ipinakita sa Environmental Impact Statement (EIS), na nilayon upang protektahan at pagaanin ang masamang epekto ng proyekto sa kalusugan ng komunidad, kapakanan at kapaligiran.

Ang mga pagsasaalang-alang sa kapaligiran ay dapat ding isama sa lahat ng mga yugto at aspeto ng proyekto.

Isinasaad pa ng ECC na “sinasaklaw nito ang proyektong sanitary landfill para sa mga residual at ginagamot na mapanganib na mga basura na may kapasidad na humahawak ng 3,000 tonelada bawat araw sa isang lugar na 100,000 metro kuwadrado.”

Napag-alaman na 5,000 residente ng Barangay Planas ang nagrereklamo sa mga potensyal na panganib sa kalusugan na maaaring makaapekto sa kanila, at nananawagan para sa pagsasara ng Prime Waste.

Lahat ng mga naghakot ng basura buhat sa lalawigan ng Pangasinan, ay dumaraan sa Purok 1, ng Barangay Planas.

Mahigpit na binabantayan ng mga punong barangay ng Barangay Babo Sacan, Pio, at Planas, host ng Prime Waste MRF, ang pagpasok ng mga trak ng basura.

Binabantayan din ng Barangay Calantas, sa Floridablanca ang paggalaw ng mga trak ng basura.

Ito ay sa gitna nang walang habas na pagbalewala ng mga naghahakot ng basura sa kapaligiran at kalusugan ng mga residente habang ibinubuhos ng mga driver ng mga trak ang mabahong katas ng basura.

Sinabi ni Floridablanca Councilor Arnold Dimla ng Sangguniang Bayan, na muli nilang bibisitahin ang kanilang Environmental Code upang i-regulate ang pagpasok ng mga trak ng basura at upang pigilan ang mga ito sa paglabas ng mga likidong basura sa tabing kalsada.

Samantala, sinabi ng nagalit na mga residente na pinag-iisipan nilang sampahan ng kaso si Despi sa Ombudsman dahil sa pag-isyu ng ECC para sa landfill sa Porac sa kapinsalaan ng mga residente.

Si Despi ay inilipat mula sa DENR Region 8 sa DENR Region 3 noong Agosto 2023.

(ELOISA SILVERIO)